Il zîr de pagjine a nol è un anel: si tache e si rive in puescj diferents. Il toc di cheste pagjine al è di Vilac (A) a Glemone dilunc la ciclabil Alpe Adrie.
Il miôr mût par movisi al è il tren.

I puescj li che si pues cjapâ il tren a son:
⚫ Udin – Stazion, Viâl Europe Unide. Ore 7:00, partî 7:14.
⚫ Glemone – Stazion, Viâl Rome. Ore 7:20, partî 7:32.
rivant a
⚫ Villach Hbf – Stazion centrâl, Bahnhofplatz. Ore 8:55.
Co i presits a puedin cambiâ, no ju vin metûts a chi. Si cjatin online.

Il zîr a nol è par nuie dificil, a no son mûrs, lis rivis sù a lis puedin fâ ducj, ancje chel che nol va in bici ducj i dîs. La dificoltât e je alore TC (Turistic).
Si pues ancje dividi il zîr cussì:
⚫ Vilac – Tarvis: ↑ 250 m; → 35 km; 2:30 hh:mm;
⚫ Tarvis – Pontebe: ↓ 190 m; → 26 km; 1:30 hh:mm;
⚫ Pontebe – Cjargne: ↓ 310 m; → 28 km; 1:30 hh:mm;
⚫ Cjargne – Glemone: ↓ 50 m; → 16 km; 0:45 hh:mm;

Lis fermadis a son ta lis citâts cu lis stazions; i timps metûts a valin se un al va simpri vie ator i 10-15 km/h. In chest mût dut il timp che al covente al è di 6:15 hh:mm.

DESCRIZION DAL ZÎR

Il zîr su la Alpe Adrie al tache a li de stazion dai trens di Vilac, te place Bahnhof.
In pôcs centenârs di metris si rive te place maiôr e daspò sul Flump Drau, che si côr in bande dilunc pistis pes bicis fintremai che si zonte cul Flump Gail. Lant indenant a son piçulis rivis sù e jù su stradelis - ma nuie di ce.
Di gnûf su piste pes bicis e a tache la rive sù bande il confin di Thöl-Cocau, cuasi dut ca nol tire sù masse. Si reste simpri tal bosc, ancje se si viodin distès i monts des Alps, come il grup dal Màngart e il riûl Slizza, l'unic riûl talian cal rive al Danubi.
Dongje ae fin dal toc in Austrie si viôt il pas de autostrade, il pasaç da un stât a chel altri. Chi e je une de rivis sù di dut il zîr: si passe il pas propite adalt, lant sù par tornants e voltis. Ancje se no tire sù masse - pensant a chei altris zîrs - a mene rispiet a chei altris tocs de zornade.

Jentrâ in Italie al vuel ancje dî che si jentre tal Bocs di Tarvis.
Dongje di Cocau e je un altre rive sù dilunc strade asfaltade di paîs. Lant indenant fin a Cjamparòs a son altris, ma piçulis e ca no tirin sù: prime ca fos une piste pes bicis a fo une ferade.
Il zîr par navigatôr al à un disviament dal Alpe Adrie cal passe par Tarvis, li che si pues fermâsi e cjoli alc. Si torne subit ae piste pes bicis, lant vie plui o mancul in plane viers Cjamparòs e passant a Nord da la Mont Sante dal Lussari.
Passât il paîs di Cjamparòs e tache la vere rive jù, fin insom. Si vâ indenant pe Val Canâl dilunc la vecje ferade, cun ator lis Valadis Riûl dal Lâc, Bartul, Saisare, Malborghet e lis cimis dal grup dai Jôf.
Di no pierdi il Bosc di Tarvis, cal è dilunc fûr dutis lis valadis apene dîtis cun i siei 24'000 etars, la plui grande foreste d'Italie. Dentri dut ce cal pô jessi come plantis e bestis.

A Pontebe si passe de Val Canâl a la Val Canal dal Fier, lant alore bande Sud ma no plui tal font de valade ma stant adalt e viodint cusì tantis bielis robis: al tache un dai tocs miôr. Une serie di panoramis, galariis e vecjos puints de ferade, li che si viôt il flump disot.
A no si dismentearan dal sigûr i salts da la aghe dilunc la piste pes bicis, miôr di dutis chê a mieç fra Dogne e Scluse. Di no pierdi, un voli al Jôf di Montâs dal puint disore Dogne.
Passade Scluse, si vâ indenant di rive jù e si passe parsore de fontane de aghe di Vilegnove - che si pues rivâ lant jù de piste. Difûr une galarie un altri puint de ferade parsore la Fele, passat chel la piste e tache a stâ dilunc la Pontebane ma stant simpri lontan.

Si passe pal centri dal paîs di Resiute par lâ indenant pe ciclabil dentri dôs lungjis galariis.
Une volte fûr, di cjape il sotpassaç che al puarte a Mueç. Prime di jentrâ tal paîs, ae taronde, si va indenant a çampe, dilunc la Fele. Al paîs di Cjampiûl si passe dal asfaltât ae strade blancje, ben tignude e ca ducj a puedin fâ.
In pôcs minûts si rive al Puint di Cjargne. Si passe di gnûf il flump, tornant ae bande Est de valade e al paîs di Cjargne. Si jentre dentri, passant in bande de stazion dai trens. Lant fûr si salte ancjemò la statâl lant vie su strade blancje.
Cusì si rive a Puartis. Pôcs centenârs di metris su la Pontebane e di gnûf fûr, su asfaltât par Puartis Vecje.
Une altre volte su la Pontebane, juste par traviarsâle e jentrâ in Vençon.

Si scuèn fermâsi te citât storiche di Vençon. Al è di viodi il domo, cu la sô liende, la glesie des mumiis, il batisteri e la place. Lant fûr si torne ae piste par lis bicis, finîde di pôc, lant vie in plane tai boscs fintremai i Riui Blancs.
Une piçule rampute e po l'ultin toc di rive jù dal zîr, de bande Ovest dal Mont di Cumieli. Subit si rive a Glemone, cun parsore il Mont di Cuarnan.
Li di une svolte a çampe si va fûr de piste pes bicis, rivant al asfalt e lant vie drets e in plane, rivant ae stazion dai trens di Glemone, ae fin dal zîr.

Il zîr al è lunc in dut 104 km, plui che altri di rive jù e cun plui e mancul 500 m di rive sù, in Austrie, rivant in Italie.
Si pedale cuasi dut dilunc la piste pes bicis, ce cal vanze al è su strade blancje buine e cualchi tocut su statâl, ma distès largje e cence fastidis par chei come nô in bici.
Il zîr al è sempliç, in puescj cuiets, passant dentri o in bande tancj paîs: cusì si pues fâ il zîr vie pe Viarte, la Istât e l'Autun. Stant che la fature e la dificoltât a son bassis, ducj a rivin a fâle.

MTB Friuli al dîs grasie, prime di dut, ae sezion CAI di Tresesin pe organizazion e ae sezion ÖAV di Vilac par sedi vigûts e vênus fat di guide in Austrie. Un biel grasie a Daniele, Jessica, Emi, Raffaella, Carlo, Lorenzo, Catia, Luca, Dario, Antonio, Silvia, Christina e Wolfgang pe pedalade e pe ridadis dilunc le gjite.
Note: te Istât 2023 o vin fat dut l'Alpe Adria come nestri viaç dal an, vint mût di sistemâ ancje cheste pagjine.